Gamon ki chaadar ko hata de apni palkon se,
Mubarak ho doston Diwali ka paigaam aa gaya hai.
Diwali hindu biradari ka woh paak aur khushi ka din hai, jab Bhagvaan Ram, unki dharmpatni Sita Devi aur bhrata Bhagvaan Lakshman 14 saal ke vanvaas ke baad Raavan par vijay paakar Ayodhya laut aaye the, jahan gaaon walon ne khushi ka izhaar karte hue Shri Ram ji ke liye har raaste ko chiraagon se roshan kiya tha, jo Hindu dharm ke liye khasoosi din mukarrar hua.
Iss din ki aehmiyat ko maddenazar rakhte huye hamari Waadi-ae-Kashmir ke Hindu, Muslim, aur Sikh biradari ke log ek saath milkar Diwali ki roshni se apne gharon ko roshan karte hain. Aasmaan mei ujala karne wale rangeen patakhe jalate hain, aur saath mei mithaiyon ki dukaan bepanah rash se khil uthe nazar aate hain.
Khoobsurati se maala-maal iss waadi ko aur nikhaar tab aa jaata hai, jab raat ke pursakoon lamhaaton mei Mandir bhaqt mosiki aur bhajan se goonj uthte hain. Ek taraf duwaon ki aahuzari ki jati hai, aur dusri taraf bhaichaare ke saath mithai ke tohfe baante jaate hain. Gharon ko diye aur rangbirangi roshniyon se aese sajaya jata hai, jese lagta hai aasmaan se utra hua satrangi ka nazara.
Ghaati me har Diwali ke mauke par yahan ke Muslim biradari ke kumhaar karigar iss tyohaar ko izzat bakshte hue kai saare khoobsurat diyon ko apne haathon se banate hain.
Agar gat-varsh ki baat karen toh Srinagar ke nishaat se taaluk rakhne wale Umar Kumar hain, jinhone Diwali ke mauke par 15,000 diyon ki farmaeesh ko pura kar waadi me chaar chand laga diye.
Isse yeh pata chalta hai ki waadi mei inn tyohaaron se na sirf aman ka chaand nazar aata hai, balki inn tyohaaro se hamare rozgaar ko kaamyaabi ka mukaam ataa hota hai. Hamari dua hai ki prakaash ka yeh tyohaar sabhi ke liye khushhaali, shaanti aur samraddhi laaye.